Mag-ama patay sa pamamaril

LEGAZPI CITY, Albay, Philippines — Magkasabay na napaslang ang mag-amang lulan ng motorsiklo makaraang pagbabarilin ng hindi kilalang lalaki sa kahabaan ng provincial road sa Barangay Taladong sa bayan ng Camalig, Albay kamakalawa ng gabi. Kinilala ang mag-ama na sina Galo Navarro, 53; at Rommel Navarro,18, kapwa nakatira sa Purok-4, Barangay Tagoytoy sa nasabing bayan. Sa police report na nakarating sa Camp Simeon Ola, pauwi na ang mag-amang lulan ng motorsiklo nang biglang sumulpot sa kanilang daraanan ang hindi kilalang lalaki saka pinagbabaril ang dalawa. Sinisilip ng pulisya ang anggulong may nakaalitan ang mag-ama sa kanilang barangay kaya sila niresbakan.