Cafgu kinidnap ng NPA

MANILA, Philippines — Dinukot ng mga rebeldeng New People’s Army (NPA) ang isang tauhan ng Cafgu  sa bayan ng Bansud, Occidental Mindoro kamakalawa ng gabi. Base sa ulat ni Army’s 203^rd Infantry Brigade Commander Brig. Gen. Antonio Parlade, kinilala ang biktima na si Jonathan Manlabo ng Barangay Pinagturilan, bayan ng Sta Cruz. Bandang alas -6:30 ng gabi nang kidnapin ang biktimang naghahapunan kasama ang kaniyang pamilya sa loob ng kanilang bahay. Sinabi ng misis ng biktima na hindi armado ang kaniyang mister ng mangyari ang insidente. Walang nagawa ang biktima matapos na tutukan ng baril saka kaladkarin ng mga rebelde patungo sa direksyon ng kabundukan. Kinondena naman ni Parlade ang insidente  at agad na ipinag-utos ang hot pursuit operations laban sa grupo ng mga rebelde.