Totoy dedo sa pamamaril ng NPA
LEGAZPI CITY, Philippines — Napatay ang 14-anyos na totoy makaraang madamay sa pamamaril ng mga rebeldeng New People’s Army (NPA) sa mga sundalo ng 1st Infantry Batallion ng Philippine Army sa Barangay Libertad sa bayan ng Cawayan, Masbate noong Linggo ng hapon. Napuruhan sa iba’t-ibang bahagi ng katawan ang biktimang si Vincent Jaylord Pequero, Grade 8 student at nakatira sa nasabing barangay. Base sa police report na nakarating sa Camp Simeon Ola, dakong alas 4:30 ng hapon habang naglalaro ng basketball sa barangay plaza ang mga sundalo at ilang residente nang ratratin ng mga rebelde ang palaro. Wala namang iniulat na namatay sa panig ng mga sundalo subalit natagpuan ng mga barangay opisyal ang biktima na sinasabing nanonood lamang ng basketball ay duguang nakabulagta na may mga tama ng bala sa katawan.
- Latest