Drug pusher bulagta sa buy-bust

LEGAZPI CITY, Philippines — Bulagta ang sinasabing  notoryus na drug pusher matapos itong makipagbarilan sa mga pulis sa  inilatag na buy-bust operation laban sa bahagi ng Maharlika Highway sa Barangay Pangpang, Sorsogon City, Sorsogon noong Linggo ng umaga. Kinilala ang napatay na si Crisanto Bautista Platino ng Barangay Sampaloc kung saan narekober ang cal. 38 revolver na may mga bala at ilang plastic sachet na shabu. Sa ulat ng pulisya na nakarating sa Camp Simeon Ola, dakong alas-10:15 ng umaga, ikinasa ng mga operatiba ng Sorsogon Police ang buy-bust operation laban kay Platino. Gayunman, nakatunog ang suspek na pulis ang kanyang katransaksyon kaya tinangkang mamaril pero inunahan na siyang paputukan ng mga operatiba.