13-anyos sakote sa droga
NORTH COTABATO, Philippines — Naglaho ang kinabukasan ng 13-anyos na hayskul student na sinasabing pinaglako ng droga ng sariling ina matapos itong madakip ng mga jailguard sa pagpupuslit ng pakete ng shabu sa Zamboanga del Norte provincial jail kamakalawa ng tanghali.
Ayon sa pulisya, narekober sa medyas ng 13-anyos na estudyante ng Zamboanga Del Norte National High School sa Dipolog City ang pakete ng shabu matapos itong dumaan sa inspeksyon.
Narekober ang cellphone ng bata kung saan may text messages ng ina na si Rebecca Buaya na nag-utos sa bata na bumili ng shabu at dalhin sa kanyang selda sa Zamboanga Norte Correctional And Rehabilitation Center sa bayan ng Manukan.
Nabatid na si jailguard Susana Tolentino ang nakadiskubre ng droga at ang text messages ng ina ng menor-de-edad sa cellphone.
Nasa pulisya na umano ang bata at may pahintulot umano ang Department of Social Welfare dito habang inihahanda ang kaso laban sa mag-ina.
- Latest