Pulis-tulak utas sa buy-bust

BAYOMBONG, Nueva Vizcaya  , Philippines – Napatay ang 38-anyos na pulis na sinasabing nagtutulak ng droga matapos itong makipagbarilan sa mga kabarong pulis sa inilatag na buy-bust operation sa Barangay Bangan sa bayan ng Sanches Mira, Cagayan, kamakalawa ng hapon. Kinilala ni P/Supt. Chevalier Iringan, tagapagsalita ng Cagayan provincial police office ang napatay na si PO2 Shelwin Pascual ng Piat police station at residente ng Barangay Bulala, Camalaniugan sa Cagayan. Dakong alas-4: 40 ng hapon nang isagawa ng mga awtoridad ang anti-drug operation laban kay P02 Pascual subalit nakatunog na kabaro niya ang poseur-buyer kaya ito tumakas sakay ng motorsiklo. Gayunman, nakorner si P02 Pascual kaya nauwi sa shootout ang insidente kung saan napatay ito. Narekober kay P02 Pascual ang cal. 9mm pistol na may 12 bala, magazine na nay sampung bala, plastic sachet na shabu, at ang marked money.