Saleslady tiklo sa P129 eyeshadow

CAVITE, Philippines – Rehas na bakal ang binagsakan ng 23-anyos na sales lady matapos itong masakote sa pang-uumit ng eyeshadow na nagkakahalaga ng P129 sa loob ng sikat na mall sa Barangay Habay 2 sa Bacoor City, Cavite kahapon. Pormal na kinasuhan ng qualified theft sa piskalya ang suspek na si Lovielyn Tantay y Fuentes ng #124 Barangay Mambog 3 sa nabanggit na lungsod. Base sa imbestigasyon ni PO2 Reagan F. Fama, naaktuhan ang suspek sa pang-uumit makaraang makita sa CCTV camera ng mall. Kaagad na inaresto ng mga civilian guard na sina Marisa Naranjo at Mansueto Nolledo ang suspek na hawak pa ang eyeshadow saka dinala sa himpilan ng pulisya para sa kaukulang disposisyon.