Truck vs tricycle: 3 patay, 2 malubha
LEGAZPI ALBAY, Albay , Philippines - Tatlo katao ang patay habang kritikal ang dalawa matapos na salpukin ng truck ang kasalubong na tricycle sa kahabaan ng Maharlika National Highway sa Zone 3, Brgy. Balangibang sa bayan ng Polangui, Albay noong Huwebes ng madaling araw.
Dead-on-the spot si Rodrigo Amparado, 53-anyos, driver ng tricycle, ng Brgy. Sta. Cruz, Libon at mga pasaherong sina Amelita Amparado, 52 at Madeline Pontellas, 32, pawang mga residente ng nasabing barangay. Sugatan naman sina Merna Tangilon at Robert Ongcan at kasalukuyang ginagamot sa Bicol Regional Training and Teaching Hospital sa Legazpi City.
Sa ulat sa Camp Gen. Simeon Ola, dakong alas-4 ng madaling araw, binabaybay ng tricycle lulan ang mga biktima ang kahabaan ng highway nang bigla silang banggain ng kasalubong na truck (AC-09002) na minamaneho ni Brando Manalo, ng Oriental Mindoro.
Ayon sa mga saksi, mabilis ang takbo ng truck na minamaneho ni Manalo kaya nabulaga ito nang makita ang isa pang truck na nasiraan sa kanyang unahan dahilan para mawalan ng kontrol sa manibela at bumangga sa kasalubong na tricycle.
- Latest