4 arestado sa drug trade

LUCENA CITY, Quezon , Philippines  – Kalaboso ang apat na drug suspek makaraang makumpiskahan ng P.1 milyong halaga ng shabu sa inilatag na anti-drug operation sa dalawang barangay sa Lucena City, Quezon, kahapon ng madaling araw. Ayon kay P/Supt. Art Brual Jr., chief of police sa Lucena City, unang nasakote sa buy-bust operation sa Purok 3B, Barangay Dalahican ang magka-live-in na sina Rosalie “Talya” Flores, 44; at Noriel “Tisoy” Menor, 49. Nasamsam sa mga suspek ang 10 plastic sachet ng shabu (2.49 gramo) at P8,000 at P500 marked money na ginamit ng pulisya. Samantala, naaresto din ang mga suspek na sina Maica Gonzaga at Cherelyn Mellomida sa buy-bust operation ng mga operatiba ng pulisya sa pamumuno ni P/Supt. Marlowe Torina kasama si Kagawad Jun Buenaflor sa Purok Central sa Barangay Ibabang Dupay kahapon ng madaling araw. Narekober ang 50 gramo ng shabu at P1,000 marked money na ginamit sa buy-bust operation.