Lolo kinatay ng sariling utol
LEGAZPI CITY, Albay, Philippines - Napatay ang 60-anyos na lolo makaraang pagtatagain ng sariling kapatid habang nag-iinuman sa Purok 6, Barangay Mayon sa bayan ng Castilla, Sorsogon kamakalawa ng hapon. Idineklarang patay sa Vicente Peralta Memorial Hospital ang biktimang si Jose Alvarado Jr. habang arestado naman ang suspek na si Salvador Alvarado, 62, kapwa nakatira sa nasabing barangay. Base sa police report na nakarating sa Camp Simeon Ola, masayang nag-iinuman ang magkapatid kasama ang ilang kamag-anak at kabarangay nang maungkat ang matagal ng alitan ng dalawa. Sumiklab ang mainitang pagtatalo kaya kumuha ng itak si Salvador saka pinagtataga si Jose hanggang sa duguang humandusay sa harap ng mga kainuman na hindi nagawang umawat dahil sa bilis nang pangyayari.
- Latest