NPA attack sa 2 police station, nasilat

ZAMBALES, Philippines - Napigilan ng mga pulis ang tangkang pag-atake ng mga rebeldeng New People’s Army (NPA) sa dalawang himpilan ng pulisya sa ba­yan ng Botolan, Zambales kahapon ng madaling araw.

Unang tangkang pag-atake ng mga rebelde sa base ng 2^nd platoon ng Provincial Public Safety Company ng Zambales Provincial Police Office sa Barangay Taugtog.

Subalit naispatan naman ng isa sa mga pulis na naka-duty sa paligid ng base ang pagsalakay kaya agad pinaputukan ang mgarebelde hanggang mapilitang umatras patungo sa direksyon ng Sitio Bihawo.

Ilang minuto pa lamang ang nakalipas nang tangkaing lusubin ng mga rebelde ang mismong himpilan ng pulisya sa bayan ng Botolan.

Gayunman,  nakaalerto naman ang mga pulis na nakipagpalitan ng putok sa mga rebelde hanggang sa umatras din ang grupo ng NPA.

Ayon kay P/Senior Supt. Christopher Mateo, Zambales police provincial director, matagumpay na intelligence gathering at alistong tauhan ng dalawang police station kaya nabigong makubkob ng mga rebelde.