Pahinante hulog sa trak patay!

LEGASPI CITY, Albay, Philippines - Basag ang ulo ng isang pahinante nang mahulog sa sinasakyang truck habang binabaybay ang kahabaan ng Sabloyon Road sa Brgy. Basag. Ligao City, ng lalawigan kamakalawa ng hapon. Naisugod pa sa Bicol Regional Training and Teaching Hospital sa Legazpi City ang biktimang si Charlito Nig, ng Poblacion, Malinao, Albay pero idineklarang patay. Sa ulat sa Camp Gen. Simeon Ola, dakong alas-5:30 ng hapon, nakasakay ang biktima at tatlong iba sa likod ng isang truck (WCW-129) na minamaneho ni Edwin Buban, 44, ng Brgy. Estancia, Malinao patu­ngong Tabaco City nang aksidenteng mahulog ito habang naka-upo sa gilid. Nabasag ang bungo ng biktima nang tumama ang ulo sa sementadong kalsada. Iniimbestigahan na ng pulisya kung may pananagutan ang driver ng truck sa pagkakahulog at pagkamatay ng kanyang pahinante.