NPA ambush: 4 sundalo sugatan

MANILA, Philippines - Apat na sundalo ang nasugatan makaraang tambangan ng mga rebeldeng New People’s Army (NPA)  sa liblib na hangganan ng Barangay Somoge at Barangay Polangi sa bayan ng Catarman, Northern Samar noong Martes ng gabi.

Sa ulat ng Army’s 8^th Infantry Division, bandang alas-9:10 ng gabi nang maganap ang pananambang sa tropa ng Army’s 20^th Infantry Battalion sa nabanggit na lugar.

Kasalukuyang lulan ang pitong enlisted personnels ng Army’s 20^th Infantry Battalion  sa KM250 military truck nang tambangan ng mga rebelde.

Gayunman, tumanggi muna si Major Gen. Raul Farnacio, commander ng Army’s 8^th Infantry Division na tukuyin ang pagkakakilanlan ng mga nasugatang sundalo dahil kaila­ngan pang impormahan ang pamilya ng mga ito.

Agad namang sinaklolohan ng Army’s 43^rd Infantry Battalion ang mga sundalong nasugatan.

Kaugnay nito, inalerto na ni Farnacio ang tropa ng militar sa Eastern Visayas laban sa posible pang pag-atake ng NPA rebels.

Nabatid na ang AFP ay nasa defense mode na nireres­peto ang mga kasunduan sa isinusulong na peace talks sa pagitan ng pamahalaan at ng komunistang grupo.