Koreano nawala sa gubat, nasagip
Pasan-pasan ng isang pulis-Barlig ang Koreanong nasagip makaraang mawala sa Mt. Ammoyao sa bayan ng Barlig Mt. Province kamakalawa. Photo courtesy ng Barlig police
TUGUEGARAO CITY, Cagayan, Philippines - Lumitaw na rin ang 56-anyos na Koreano na naiulat na nawawala simula pa noong Martes (Hunyo 13) dahil sumuong sa kagubatan ng nag-iisa at naligaw matapos itong makarating sa isang bahay na halos mawalan ng ulirat sa Sitio Sikling, Barangay Latang sa bayan ng Barlig, Mt. Province noong Martes.?
Sa ulat ng Barlig PNP, nadatnan ni Joselito Tucyap ang biktimang si Choi Sun Kyu na nakahiga sa tabi ng kanyang bodega dakong alas-9 ng umaga kaya agad niyang ipinabatid sa pulisya ang pangyayari.?
Ayon kay P/Senior Insp. Barnard Navarra, kinailangang kargahin at kalaunan ay ilagay sa stretcher ang biktima habang itinatawid sa kabundukan patungo sa Barlig District Hospital. ?
Matatandaan na umalis sa kanyang hotel sa Poblacion ng Barlig si Kyu noong Hunyo 13 upang maglakad patungo sa pamosong Batad rice terraces sa bayan ng Banaue, Ifugao sa pagsuong sa gubat ng Pulag trail na nag-iisa.?
Kinumpirma ni P/Chief Insp. Carol Lacuata, tagapagsalita ng Cordillera PNP na tumangging mangupahan ng tour guide ang Koreano dahil kaya nito ang kanyang sarili.?
Bunga ng kanyang pagtitipid ay nagkaligaw-ligaw si Kyu sa gubat ng kabundukan kaya Latang lata ito sa gutom nang madiskubre ng mga awtoridad. ?
Nabatid din sa ulat na tumanggi rin si Kyu na magbayad ng P25 registration fee sa local na pamahalaan ng Barlig upang magsagawa ng pamumundok.?
Inilipat sa kabisera ng Bontoc kahapon si Kyu kung saan siya sinalubong ng mga kaanak at mga kinatawan ng Korean Embassy.
- Latest
