Taiwanese lunod sa dagat

MANILA, Philippines - Isang 37-anyos na Taiwanese ang nasawi matapos na malunod habang nagi-snorkeling kasama ang kaniyang kapatid at mga kaibigan sa karagatan ng Brgy. Bintuan, Coron, Palawan kamakalawa ng tanghali.

 Kinilala ni Supt. Imelda Tolentino, spokesperson ng Police Regional Office (PRO) IV ang biktima na si Liao Wei Kai, binata, pansamantalang nanunuluyan sa Nanay Vacation Home, Brgy. Poblacion 6, Coron ng lalawigan.

Sa ulat, dakong alas-11 ng tanghali habang nagi-snorkeling ang biktima kasama ang kapatid na si Liao Ying Ju, at Chou Yen Han at iba pang mga turista sa karagatan ng East Tangat Shipwreck , Brgy. Bintuan, Coron nang mapansin na lamang ni Ying Ju na nakasubsob ang mukha ng kapatid sa tubig pero hindi gumagalaw at ng kanyang siyasatin ay napansin na puro bula ang snorkeling mask nito.

 Agad na sumaklolo si Arjay Pontillar at kasamahan nitong mga divers sa biktima na agad binigyan ng cardio pulmonary resuscitation  bago ito dinala sa Coron District Hospital subalit idineklarang dead-on-arrival.