Principal utas sa Brigada Eskwela

KIDAPAWAN CITY, North Cotabato, Philippines - Kamatayan ang sinapit ng 60-anyos na punong guro makaraang makuryente habang gumagawa sa Brigada Eskwela sa Barangay Ormaca sa bayan ng San Francisco sa Agusan del Sur, kahapon ng umaga. Kinilala ni P/Chief Insp. Zandro Santillan, hepe ng San Francisco PNP ang biktima na si Josie Dela Cruz ng Ormaca Elementary School at nakatira sa nasabing barangay. Batay sa police report, naglilinis ang biktima sa paligid ng paaralan kaugnay sa ipinapatutupad na Brigada Eskwela nang mahawakan nito ang kable ng kuryente na inakalang basura. Subalit biglang nangisay ang biktima sa hinawakang kable na sinasabing nakakabit sa linya ng kuryente. Mabilis na isinugod sa bahay-pagamutan ang biktima pero idineklarang patay.