Leave ng BI employees buong Abril, kinansela

MANILA, Philippines -  Kinumpirma kahapon ni Presidential spokesperson Ernesto Abella na hindi na papayagan ang mga naka-pending na aplikasyon para mag-leave ang mga empleyado ng Bureau of Immigration sa buong buwan ng Abril.

Ginawa ni Abella ang pahayag sa gitna ng banta ni Immigration Commissioner Jaime Morente noong Miyerkules na ide­deklarang absent without leave (AWOL) ang mga empleyado ng immigration na hindi babalik kaagad sa trabaho matapos kanselahin ang kanilang approved leaves ngayong buwan.

“Immigration Commissioner Jaime Morente has already canceled all approved leaves of immigration employees and has disapproved all pending applications for leave for the month of April,” pahayag ni Abella.

Tiniyak rin ni Abella na ang Department of Budget and Management, Department of Justice at Office of the President ay nagtutulungan para matiyak na maayos na serbisyo ang ihahatid sa buong bansa lalo pa’t maraming bisita ang inaasahang darating sa bansa.

“The DBM and DOJ and OP are all working together to deliver services that best serve the entire nation, and guests who are coming in droves to experience the newfound exuberance of Filipinos,” ani Abella.

Nauna rito, naging matinding problema ang kakulangan ng mga empleyado sa mga international airports dahil sa mass resignations at mga nagbakasyong kawani ng immigration.

Samantala, inihayag rin ni Abella na wala pang tiyak na petsa kung kailan lalagdaan ng Pangulo ang Executive Order tungkol sa smoking ban.

“There is no speci­fic date yet on when the Executive Order on the smoking ban will be signed. Let us give the President the time to review the EO with due diligence,” ani Abella.