Dayo binoga sa noo, utas pinaghinalaang Spy
MANILA, Philippines - Dead on the spot ang isang 38-anyos na lalaking bumisita lamang sa kapatid nang barilin sa noo ng hindi pa kilalang salarin, sa Gasangan, Baseco Compound, Port Area, Maynila, kahapon ng tanghali.
Kinilala ang nasawi na si Jomar Manalo, ng Maharlika Village, Taguig City.
Blanko pa ang pulisya sa pagkakakilanlan sa tumakas na suspek na armado ng baril na hinihinalang hitman ng ‘tulak’ sa lugar.
Sa ulat ni SPO3 Jonathan Bautista ng Manila Police District-Homicide Section, naganap ang insidente dakong alas- 11:30 ng tanghali nang makarinig ng putok ng baril ang mga residente at nakita na lang na nakabulagta ang biktima sa Block 11, Gasangan.
Nabatid na hindi umano kilala ng ibang residente ang biktima dahil may isang buwan pa lamang itong nakikibakasyon sa bahay ng kapatid sa Block 11 Gasangan, Baseco Compound .
May teorya na posibleng pinaghinalaang spy o police asset ang biktima dahil bagong mukha ito sa lugar kaya maaaring ipinatumba ng mga taong nasa likod ng pagbebenta ng iligal na droga sa lugar.
Patuloy pang iniimbestigahan ang insidente.
- Latest