Joma uwi na – Duterte

MANILA, Philippines - Hinimok ni Pangulong Duterte si Communist Party of the Philippines (CPP) founding chairman Jose Maria Sison na umuwi na lamang sa Pilipinas lalo pa’t may sakit na siya.

Ginawa ng Pangulo ang pahayag bago ang pagkakalagda ng interim ceasefire agreement sa pagitan ng gobyerno at National Democratic Front (NDF) sa 4th round ng formal peace talks sa The Netherlands.

Ayon sa Pangulo, handa niyang sagutin ang lahat ng gagastusin ni Joma Sison sa kanyang hospitalization sakaling magdesisyon na umuwi ito ng bansa.

Malaya rin umanong makauwi ng Pilipinas si Sison at walang aaresto sa kanya.

Ayon pa sa Pangulo, handa siyang magbayad para sa pagsasaayos ng kanyang pag-uwi kung gustuhin niya.

Kasabay nito, inulit ng Pangulo ang kanyang kondisyon sa pagpapatuloy ng peace talks at paglagda ng bilateral ceasefire agreement.

Kabilang dito ang pagtigil ng mga komunista sa koleksyon o pagkikil daw ng revolutionary tax at huwag mang-angkin ng teritoryo sa loob ng bansa.

“But there are these three things that I will not. Una is to stop the revolutionary tax. Napapahiya ako eh. So if you continue, engkwentro talaga tayo diyan. Second is release all prisoners. Sabi nila within the next two days. Third is do not claim any territory in this, may-ari as an administrator of government ako ang may ari ng lahat ng lupa dito. Do not claim any territory. Kasi pagpasok ng mga sundalo at sibilyan sabihin man nila na eh pumasok siya sa teritoryo namin. Sabi ko loko-loko ka ba? Anong teritoryo? Not even a barangay. Para magkapareho tayo ng dimensions sa buhay, huwag ‘yung pagsabi mo eh mahirap ‘yun. Then guarantee of a ceasefire that’s not… That’s more or less substantial on the parameters really established,” dagdag ni Pangulong Duterte.