Alaska ‘di naawat ng Mahindra

MANILA, Philippines - Matapos magtayo ng 10-point lead sa opening period ay hindi na nagpapigil ang Alaska sa Mahindra para sa kanilang ikatlong sunod na arangkada.

Nagposte si import Cory Jefferson ng 30 points, tampok ang 4-of-5 shooting sa three-point line at 11 rebounds para tulungan ang Aces na patumbahin ang Floodbuster, 98-92 sa 2017 PBA Commissioner’s Cup kagabi sa Mall of Asia Arena sa Pasay City.

Nagdagdag naman si small forward Calvin Abueva ng 17 markers at 6 boards para sa 3-0 baraha ng Alaska habang may 11 points si center Sonny Thoss.

“It was a good start. It helps when your import’s on fire,” sabi ni head coach Alex Compton kay Jefferson. “Sonny Thoss was awesome. He played like an import.”

Nalasap naman ng Mahindra, nakahugot kay balik-import James White ng 30 points kasunod ang 13, 12 at 10 markers nina Mark Yee, LA Revilla at Gary David, ayon sa pagkakasunod, ang ikatlong kabiguan sa apat na laro.

Kaagad kinuha ng Aces ang 28-18 abante sa Floodbuster sa first quarter bago ito pinalaki sa 74-61 sa pagtatapos ng third period.

Ang put back ni rookie Carl Cruz at hook shot ni Thoss ang nagbigay sa Alaska ng 16-point lead, 97-82 sa huling 1:46 minuto ng final canto bago nakalapit ang Mahindra sa pagtatapos nito.

Tuluyan nang nabigo ang Floodbuster, nanggaling sa tagumpay laban sa NLEX Road Warriors, na maiposte ang kanilang ikalawang sunod na panalo.

ALASKA 98 - Jefferson 30, Abueva 17, Thoss 11, Racal 8, Cruz 8, Enciso 6, Exciminiano 5, Galliguez 5, Pascual 2, Casio 2, Mendoza 2, Andrada 2, Magat 0.

Mahindra 92 - White 30, Yee 13, Revilla 12, David 10, Mallari 7, Celda 5, Paniamogan 5, Guevarra 2, Teng 2, Galanza 2, Ballesteros 2, Elorde 2, Deutchman 0, Caperal 0, Salva 0.

Quarterscores: 28-18; 50-40; 74-61; 98-92.