Nagpakauwaw nga bunga
Wa’y arang sa administrasyon ni Presidente Rodrigo Duterte. Tungod sa popularidad sa presidente ug tungod sa makabungog nilang mayoriya sa Kongreso, ang kadagkoan sa administrasyon kumbinsido nga wa sila’y dili mahimo, nga bisan unsay ilang gusto ilang makuha.
Mao nga gihudlat nila og impeachment ang mga mahistrado sa Korte Suprema nga mangahas pagbabag sa ilang mga proyekto. Mao nga gitinuod gyud pagsilot ang mga sakop sa super majority sa House of Representatives nga nangahas pagsupak sa death penalty bill, ug maong nipasidaan pag-impeach ni Bise Presidente Leni Robredo.
* * *
Ang pasidaan batok ni Robredo nga unang gihimo ni House Speaker Pantaleon Alvarez, nga mao sab ang nanghulga sa mga mahistrado ug sa iyang mga sakop sa majority bloc, gidasonan ni Solicitor General Jose Calida nga nipasangil sa bise presidente og treason (pagbudhi sa nasud).
Nipahibawo sab dayon si DILG Assistant Secretary Epimaco Densing nga may mga abogado na nga nag-andam og mga ebidensiya batok ni Robredo. Nipasangil ang Malakanyang, bisan gipanghimakak sa militar ug intelligence agencies, nga organisado ang mga lakang pagpalagpot ni Duterte sa katungdanan. Nabantang hinuon nga mas paspas ug organisado ang mga paningkamot pagpalayas ni Robredo.
* * *
Kun may nagduda pa nga gitabangan sa labing dagkong opisyal sa administrasyon si Robredo, nidalidali og tampo sa iyang tingog si Senate President Koko Pimentel kinsa nipahinumdom sa tanang hingtungdan nga ang impeachment duwa sa numero. Naneguro na si Pimentel nga ma-impeach gyud si Robredo kun tinud-on ni Alvarez kay 100 ra ka boto ang gikinahanglan pagduso sa Articles of Impeachment batok ni Robredo ug sa labing uwahing ihap gisuportahan si Alvarez sa labing menos 230 ka kongresista.
* * *
May nakalimtan sila si Pimentel, Alvarez, Calida, Densing ug ubang naglibot ni Presidente Duterte, dili ang administrasyon, kun dili ang katawhan, maoy nipadaog ni Robredo sa niaging piniliay, ug ang katawhan maoy tinuod nga magbuot niining nasura. Gisigehan og pasangil sa mga turutot ni Duterte si Robredo nga hangol sa gahum nga dili kahuwat pagbanos sa Malakanyang. Ambot nataligam-an ba lang ni Pimentel, o maoy tinuod nga naghinam-hinam nga mosaka ang iyang ranggo, nga siya ang mopuli kun mapalagpot si Robredo. Nag-anam katinuod ang kabalaka nga si Pimentel maoy bunga nga nahagbong layo sa punoan.
* * *
- Latest
