Proyekto alang sa Sugbo

Dulom akong pagtuo kaniadto nga dili gayud madayon ang ikatulo nga tulay nga nagkonektar sa mainland Cebu ug Mactan Island. Apan niining groundbreaking alang sa Cebu-Cordova Link Expressway, madayon na gayud diay kining mao nga proyekto.

Kaniadtong Miyerkules, mismo si Presidente Rodrigo Duterte ang nanguna sa groundbreaking  ceremony alang sa maong higante nga proyekto. Sa kantidad nga P28 bilyones, gi-target nga mahuman ang maong proyekto sulod sa tulo ka tuig.

Hagbay ra nga giplano ang maong proyekto. Sa nakalabay nga mga administrasyon miarangkada na ang maong lakang. Apan wala kini kabuwelo gumikan lagi sa rason nga wala’y klaro nga kontraktor bisan pa man sa agresibo nga lakang pagpadali niini.

Maayo na lamang kay misulod sa eksena ang Metro Pacific Tollways Development Corporation ni business tycoon Manny Pangilinan nga andam nga misalo sa maong proyekto pinaagi sa Public-Private Partnership sa kagamhanan.

Gani saad ni Pangilinan nga daghan unya’ng proyekto ang ibubo sa iyang kompanya sa Sugbo, ilabina sa dakbayan sa Sugbo. Iyang nakita ang dakbayan nga adunay dakong potensiyal nga mamahimong destinasyon sa dagko pang mga investment.

Sama niining ikatulo nga taytayan, nagkinahanglan ang Sugbo og mga proyekto nga pang-inprastraktura. Lakip na niini ang moderno nga mass transport system nga hagbay rang gikinahanglan sa Metro Cebu ug kinatibuk-ang lalawigan.

Dugay rang gi-proposed ang pagbutang og light rail transit (LRT) sa probinsiya apan ang problema kay adunay lokal nga mga opisyal ang dili mouyon. Anaay plano alang sa bus rapid transit (BRT) apan sulod lamang kini sa dakbayan sa Sugbo.

Hinaut nga ang pagbugkal alang sa bag-ong taytayan mao nagtisok sa liso sa rebolusyon alang sa dugang pang dagkong proyekto alang sa Sugbo. Gikinahanglan kaayo kini alang sa tinud-anay nga ekonomikanhong kalamboan sa probinsiya.