1 dedo, 8 timbog sa buy bust

BULACAN, Philippines - Bulagta ang isang lalaking sinasabing notoryus na tulak ng shabu habang walong iba pa ang naaresto sa magkasunod na buy bust operation ng pulisya sa Brgy. Taal at Brgy. Caingin sa Bocaue ng lalawigang ito kahapon ng madaling araw. Nagtamo ng ilang tama ng bala na nagresulta ng agarang kamatayan ang suspek na si Leonardo Aquino, nasa hustong gulang, residente ng Brgy. Taal sa bayang ito at kabilang sa Barangay Anti-Drugs Abuse Council ng naturang lugar. Kasalukuyan namang nakadetine ang iba pang mga suspek na sina Manolo Mercado, 34; Raymund Condez, 31; Ryan Gonzales, 27, pawang residente ng Brgy. Taal; Jojo Delos Santos, 41, ng Brgy. Antipona; magkamag-anak na sina Allan Nicolas, 40, Felimon Nicolas, 31, Angelito “Angel” Nicolas 24 na mga residente ng Brgy. Caingin; at Warren Bermejo, 38 ng Brgy. Ilang-Ilang sa Guiguinto.