Encounter: 2 pang kidnaper na Abu utas
MANILA, Philippines – Dalawa pang bandidong Abu Sayyaf na sangkot sa kidnapping –for- ransom ang napatay sa pagpapatuloy ng opensiba ng militar laban sa ektremistang grupo sa bayan ng Panamao, Sulu noong Miyerkules ng umaga.
Ayon kay AFP Western Mindanao Command Spokesman Major Felimon Tan, bandang alas-7:20 ng umaga nang muling makasagupa ng mga tauhan ng Joint Task Force (JTF) Sulu ang grupo ni Abu Commander Alhabsy Misaya sa liblib na bahagi ng Barangay Pugad Manaul.
Sa panibagong bakbakan ng Army’s 35th Infantry Battalion at ng mga bandido ay napatay ang dalawa pang Abu Sayyaf.
Isa sa dalawang napatay ay nakilala lamang sa alyas Dadis habang sugatan din ang isa nilang kasamahan.
Noong Martes ay napatay sa bakbakan ang magkapatid na Abu Sayyaf na sina Nixon Muktadil at Brown Muktadil sa Brgy. Daungdung, Pata, Sulu.
Base sa record ng militar, ang mag-utol na Muktadil ay sangkot sa pagdukot sa 26 Indonesian at Malaysian sa hangganan ng karagatan ng Pilipinas at ng nasabing mga bansa ngayong 2016.
- Latest