20-anyos dalaga, isinilid sa plastic ng basura
MANILA, Philippines - Kalunus-lunos na kamatayan ang sinapit ng 20-anyos na dalaga matapos itong matagpuan na nakasilid sa plastic ng basura at itinapon sa bakanteng lote ng subdibisyon sa Barangay Ibaba, Sta. Rosa City, Laguna noong Biyernes ng hapon.
Sa ulat ni P/Supt. Giovanni Martinez, hepe ng Sta. Rosa City PNP na nakarating sa Camp Crame, bandang alas-4 ng hapon nang makatanggap ng tawag sa telepono ang pulisya kaugnay sa nadiskubreng bangkay ng babae.
Bandang alas- 6:20 ng gabi nang marekober ang bangkay ng babae na may taas na 5-talampakan, nasa pagitan ng 20-30 anyos, nakasuot ng itim na leggings at kulay asul na T-shirt, blonde ang buhok at may pulang relos.
Sa salaysay ni Adolf Silot ng Phase 6, Garden Villas 3, dakong alas -3:15 ng hapon habang nasa loob siya ng bahay nang marinig ang ingay ng sasakyan.
Agad na sumilip sa bintana si Silot kung saan nakita niya ang pulang Sedan na humaharurot palayo matapos na itapon ang malaking plastic ng basura.
Ini-report naman ni Silot sa mga opisyal ng homeowners association ang kaniyang nasaksihan at dito na nadiskubre ang bangkay ng babae na nakasilid sa plastic ng basura.
Bandang alas-11 naman ng gabi, kinilala ng kaniyang pamilya ang bangkay sa John Paul Funeral Parlor na si Marie Antonette Tan ng B4 L-25, St. Rose Village 1, Brgy. Ibaba ng nasabi ring lungsod.
- Latest