Onsehan: 3 drug pushers, itinumba
MANILA, Philippines - Pinaniniwalaang onsehan sa bentahan ng droga ang isa sa motibo kaya niratrat at napatay ang tatlong notoryus na drug pusher sa bayan ng Tagolo-an, Misamis Oriental kamakalawa.
Base sa police report na nakarating sa Camp Crame, kinilala ang tatlo na sina Julieto “Golyat” Ledesma, 36; Niel “Nenel” Dagos, 31; at Onofre Aspiras, 48, mga nakatira sa nasabing bayan.
Ayon sa pulisya, dakong alas-12 ng hatinggabi nang sumalakay ang mga armadong kalalakihan na nakasuot ng bonnet at jacket sa bahay ni Ledesma sa liblib na lugar ng nasabing bayan.
Ayon sa mga kapitbahay, narinig pa umano nila ang pagmamakaawa ng mga biktima sa gunmen para sa kanilang buhay kung saan tila hinahanap umano ng mga suspek ang pera sa droga.
Gayunman, ilang minuto pa ang nakalipas ay sunud-sunod na putok ng baril ang umalingawngaw kung saan magkakasabay na bumulagta ang tatlo.
Narekober sa crime scene ang mga basyo ng bala cal.30mm pistol at ilang plastic sachet ng shabu.
- Latest
