Mag-utol na nene pinatay, itinapon sa ilog
QUEZON, Philippines – Kalunus-lunos na kamatayan ang sinapit ng mag-utol na nene na sinasabing pinahirapan muna saka itinapon sa ilog ng Iyam sa Purok Balagasan, Barangay 1 sa Lucena City, Quezon kamakalawa ng gabi.
Sa ulat na nakarating kay P/Supt. Dennis de Leon, hepe ng Lucena City PNP, nakilala ang mga biktima na sina Jasmine Almariego, 6; at Jhoana Almariego, 5, kapwa nakatira sa nasabing lugar.
Ayon kay PO3 Michael Subieto, si Jasmine ay natagpuan ng ilang residente dakong alas-10:55 ng gabi.
May malaki umanong sugat sa noo ang biktima na palatandaang hinataw ito ng matigas na bagay kung saan wala rin itong pang ibabang saplot.
Samantala, bandang alas-6:15 ng umaga kahapon natagpuan naman ng mga kawani ng BFP at LCDRRMC ang nakalutang sa ilog na si Jhoana.
Sa inisyal na imbestigasyon, huling nakitang buhay ang magkapatid na naglalaro sa basketball court na katabi ng bangin at ilog.
Dakong alas-3 ng hapon ay nawala na sa paningin ng mga residente ang mag-utol
Patuloy naman ang imbestigasyon ng pulisya kaugnay sa sinapit ng mag-utol kung saan ang isa ay hinalay.
- Latest