3 huli sa pot session sa sementeryo

GAPAN CITY, Nueva Ecija, Philippines – Inaresto ng pulisya ang tatlong kalalakihan habang nasa kainitan ng kanilang paggamit ng ilegal na gamot sa ilang na bahagi ng Gapan City Public Cemetery sa Barangay Mangino ng lungsod na ito, kamakalawa ng umaga. Ang tatlong naaresto ay sina Allan Gacayan, 24, binata, ng Brgy. Mangino; Robert Amurao, 30, may-asawa, ng Brgy. Pambuan, pawang sa Gapan City; at Alberto Suarez, 38, may-asawa, ng San Rafael, Bulacan. Ayon sa pulisya, may nag-tip sa kanilang concerned citizen na nasa pampublikong sementeryo ng Gapan City ang tatlo at malayang nagpa-pot session. Agad na tinungo ang nasabing lugar at naaktuhan ang tatlo na umano’y himihithit ng shabu bandang alas-11:42 ng umaga. Narekober sa mga suspek ang isang sachet ng hinihinalang shabu, dalawang piraso ng lighter, isang aluminum foil na may bahagya umanong natunaw ng hinihinalang shabu at isang aluminum foil toother.