Ex-mayor at asawang Army major tiklo sa drug trade
NORTH COTABATO, Philippines – Arestado ng mga tauhan ng Philippine Drug Enforcement Agency (PDEA) at mga operatiba ng pulisya si dating Maguing Lanao Del Sur Mayor Johaira Abinal at ang mister na si Philippine Army Major Suharto Macabuat sa kanilang bahay sa inilatag na drug bust operation sa Grand Ballon sa Cagayan De Oro City, kahapon ng umaga.
Ayon sa ulat, sinalakay ng mga operatiba ng PDEA ang bahay ng dating local official sa Brgy. Kauswagan base sa search warrant na inisyu ng korte kaugnay sa umano’y illegal drugs.
Arestado rin ang pitong suspek kabilang si Sonny Santican na mga miyembro ng sindikato ng droga.
Nasamsam sa dalawang palapag na bahay ng mag-asawa ang 200 gramo ng shabu, at cal. 45 pistol na may mga bala.
Si Macabuat ay aktibo pa sa Philippine Army na naka-assign sa Headquarters Support Group sa Fort Bonifacio. Nabatid na isinailalim sa surveillance ang mag-asawa dahil sa pagkakasangkot nila sa illegal drug trade sa nasabing lugar.
Ayon kay Adrian Alvaro, hepe ng PDEA Northern Mindanao, si ex-Mayor Abinal ay sinasabing pinakamalaking supplier ng shabu sa Southern Mindanao, Northern Mindanao, Caraga, Central Mindanao at sa Autonomous Regionin Muslim Mindanao (ARMM).
Napag-alamang si ex- Mayor Abinal ay lider ng Abinal drug group na kumukuha ng shabu mula sa mga Chinese drug lord sa Maynila sa nakalipas na 15 taon.
“Isinasagawa ang bayaran sa pamamagitan ng bank to bank transaction, kapag nagkasundo sa drug trade” dagdag pa ni Alvaro.
Itinanggi naman ni ex-Mayor Abinal ang akusasyong sangkot siya sa drug trade. Dagdag ulat ni Mario D. Basco
- Latest
