Mag-asawa dinedo ng tandem

NORTH COTABATO, Philippines – Patay ang mag-asawang nakisilong sa waiting shed ng hardware matapos itong ratratin ng riding-in-tandem assassins sa Purok 1A South Poblacion, bayan ng Maramag, Bukidnon, ayon sa ulat kahapon. Kinilala ang mag-asawang napatay na sina Fortunato Villamor at Angelina Villamor, mga nakatira sa Camp 1 sa nasabing bayan. Sa ulat na nakarating kay Bukidnon PNP spokesperson P/Senior Insp. Danielo Bellezas, nakisilong sa hardware ang mag-asawa nang pagbabarilin ng motorcycle-riding gunmen. Nakaligtas naman ang 16-anyos na anak ng mag-asawang Villamor. Sugatan naman ang mag-ina na tinamaan ng ligaw na bala ng baril. Isa sa mga anggulong sinisilip ng pulisya ay ang bangayan sa lupaing pag-aari ng mag-asawa habang narekober sa crime scene ang mga basyo ng bala ang cal. 45 pistol.