Kotse vs trak: Pamilya, 3 todas!
MANILA, Philippines - Tatlong miyembro ng isang pamilya ang nasawi matapos na sumalpok ang humahagibis na sinasakyang sa isang truck na nakaparada sa tabi ng highway sa bayan ng Tigbao, Zamboanga del Sur kamakalawa ng umaga.
Kinilala ang mga biktima na sina Marie Alejandro, mister na si Ricky at 5-anyos nilang anak na si Jeron, pawang nagtamo ng matitinding sugat sa katawan.
Sa ulat ng Zamboanga del Sur Police, dakong alas-9 ng umaga nang maganap ang insidente sa dulo Brgy. Nilo at Maragang, Tigbao.
Sa ulat, nag-overtake ang metallic Toyota Vios (ACB 7076) na nakarehistro sa Farma Iberica Corporation na minamaneho ni Arvin Climaco, 28, ng Zamboanga City sa isang truck habang binabagtas ang highway.
Nakisakay lamang ang mag-anak na pauwi na sa Davao City sa nasabing sasakyan na galing sa lungsod ng Zamboanga nang mangyari ang aksidente.
Sa sobrang bilis umano ng takbo ng kotse na minamaneho ni Climaco, nawalan ito ng kontrol sa manibela sanhi upang sumalpok sa nadiskaril na truck sa tabi ng highway.
Sa lakas ng bangga, pawang tumilapon palabas ng behikulo ang tatlo sanhi ng kanilang ikinamatay habang nasa kritikal namang kondisyon ang driver.
- Latest