Kampo ng Abu Sayyaf, nakubkob
MANILA, Philippines – Nakubkob ng mga sundalo ang isa sa mga kampo ng bandidong Abu Sayyaf Group na pinaniniwalaang ginamit na taguan sa tatlong binihag sa Samal Island matapos ang bakbakan noong Martes sa kagubatan ng Maimbung, Sulu.
Ayon kay AFP –Western Mindanao Command Spokesman Major Felimon Tan Jr., dakong alas-8 ng umaga nang makabakbakan ng 14th Scout Ranger Company ang Abu Sayyaf Group sa pamumuno ni ASG sub leader Idang Susukan sa Brgy. Gulangan.
Tumagal ng 45-minuto ang bakbakan bago nagsitakas ang mga bandido na tuluyang inabandona ang kampo sa nasabing lugar.
“Said encampment, which can accommodate more or less 200 persons and is equipped with water source, was seized amid pursuit and clearing operations launched by the operating troops,” ayon pa kay Tan
Narekober sa encounter site ang mga parte ng armas, personal na kagamitan at motorsiklo.
Wala namang iniulat na nasugatan sa panig ng militar habang nalagasan ng malaking puwersa ang mga bandido base sa mga patak ng dugo na dinaanan ng mga ito sa pagtakas.
Sa huling video na kumalat sa website ay nagmakaawa para sa kanilang buhay ang mga bihag kay incoming President Rodrigo Duterte na gawin ang lahat para makalaya sila sa bantang pagpugot.
Magugunita na nagpalabas ng ultimatum na hanggang Hunyo 13 ang mga kidnaper para maibigay ang tig P600 milyong ransom kapalit ng buhay ng kada isang bihag at kung hindi ay pupugutan ang isa muli.
- Latest
