School principal dedo sa adik na mister
MANILA, Philippines – Napaslang ang isang school principal matapos itong pagbabarilin ng sariling mister na sinasabing lulong sa bawal na droga sa loob ng eskuwelahan sa Malaybalay City, Bukidnon noong Martes ng umaga.
Tatlong bala ng cal. 45 pistol ang tumapos sa buhay ni Florina Tenorio, principal sa Casisang National High School.
Agad namang tumakas ang suspek na si Arnold Tenorio pero nasakote ito sa follow-up operation ng pulisya.
Batay sa ulat na nakarating kay P/Supt. Surki Sereñas, PNP regional spokesman, naitala ang insidente sa mismong compound ng Casisang National High School sa Brgy. Casisang dakong alas-10:48 ng umaga.
Nabatid na nagtungo ang suspek sa nasabing eskuwelahan kung saan pilit na pinauuwi na ang kaniyang misis na hinihingan nito ng pera na pambili ng bisyo pero tumanggi ang biktima.
Dito na nairita ang nasabing mister at pinagbabaril ang kaniyang asawa sa harapan ng nagulantang na faculty staff at mga estudyante.
Nagawa pang maisugod sa Bukidnon Provincial Medical Center pero namatay habang ginagamot.
Nahaharap ngayon sa kasong parricide at paglabag sa Comelec gun ban ang suspek na nakumpiskahan ng cal. 45 pistol at mga bala.
- Latest
