Bus vs. trike: 4 patay

TUGUEGARAO CITY, Cagayan, Philippines – Kamatayan ang sinapit ng apat na kalalakihan makaraang salpukin ng pampasaherong bus ang kanilang traysikel kahabaan ng national highway sa Barangay Alibagu, Ilagan City sa Isabela noong Sabado ng gabi.

Sa police report na nakarating kay P/Supt. Manuel Bringas, hepe ng Ilagan City PNP, kinilala ang mga namatay na sina Leonardo Ander, 35; Elmer Ignacio, 29;  Malito Manalo, 39; at si Jerome Galasinao, 33, mga nakatira sa nasabing lungsod.

Nakatakdang kasuhan ang driver ng bus na si Joseph Pasaraba, 50, tubong Lallo sa Cagayan.?

Nabatid na patungo sana sa Maynila ang GV Florida Bus nang makasalpukan ang traysikel ng mga biktimang mula sa inuman.

Sinasabing inagaw ng traysikel ng mga biktima ang linya ng kasalubong na bus kaya naganap ang trahedya dakong alas-10 ng gabi.?

Sa lakas ng impact ay tumilapon ng ilang metro ang mga biktima at ang traysikel kaya hindi kaagad natukoy ng mga imbestigador ang nagmaneho.