2 bihag na parak pinalaya ng NPA
MANILA, Philippines – Matapos ang isang buwang pagkakabihag, pinalaya na ng mga rebeldeng New People’s Army (NPA) ang dalawa pang pulis na prisoners of war (POW) sa Brgy. Bulonay, Impasugong, Bukidnon nitong Martes ng hapon.
Kinilala ng Bukidnon Police, ang mga pinakawalang bihag na sina SPO2 Warren Conales at PO3 Edwin Castor.
Bandang alas-5 ng hapon nang pakawalan ng mga rebelde ang nalalabi pang bihag na mga pulis at saka ipinasa kay Bukidnon Governor Jose Ma. Zubiri Jr. at sa mga lider ng relihiyon sa lalawigan.
Magugunita na kabilang ang dalawa sa tatlong pulis at dalawang sundalo na binihag ng NPA rebels sa Bukidnon, Misamis Oriental at Agusan del Norte noong Abril 3. Unang pinalaya ang bihag na pulis na si SPO4 Rene Rombo sa Talisayan, Misamis Oriental na pinakawalan nitong Lunes ng hapon.
Sa kasalukuyan, bihag pa rin ng mga rebelde ang dalawang sundalong sina Pfcs. Glenn Austia at Diven Abion Tawide na dinukot sa Buenavista, Agusan del Norte ng unang linggo ng nakalipas na buwan.
Isinailalim na sa medical examination ang pinalayang dalawang parak na isasalang din sa stress debriefing.
- Latest
