Barangay chairman, itinumba

BATANGAS, Philippines - Patay ang 47-anyos na barangay chairman matapos itong pagbabarilin ng hindi kilalang lalaki may ilang metro ang layo sa kanyang bahay sa Barangay Poblacion 3, bayan ng Bauan, Batangas kahapon ng madaling araw. Namatay habang ginagamot sa Dr. Mario Bejasa General Hospital ang biktimang si Chairman Gilbert “Pangulong Labuyo” Alvar ng nabanggit na barangay. Sa police report na nakarating kay P/Chief Insp. Jezreel Calderon, hepe ng Bauan PNP, ipinarada ng biktima ang kanyang motorsiklo sa harapan ng burger stand malapit sa kanyang bahay sa Binay Street nang lapitan at pagbabarilin. Sumakay ng traysikel ang gunmen habang inaalam ng pulisya kung may kaugnayan sa politika ang naganap na pamamaslang.