Paslit nilamon ng apoy
MANILA, Philippines – Malagim ang sinapit na kamatayan ng isang 4-anyos na batang lalaki matapos itong makulong ng apoy sa silid ng kanilang tahanan sa naganap na sunog sa Brgy. San Roque, Sto. Tomas, Batangas kamakalawa.
Kinilala ni Sr. Supt. Arcadio Ronquillo, Director ng Batangas Provincial Police Office (PPO), ang nasawing biktima na si Symone Manzanal, residente sa lugar.
Bandang alas-12:31 ng hapon nang magsimulang lamunin ng apoy ang bahay ng pamilya Manzanal sa nasabing lugar.
Agad namang nagresponde ang mga elemento ng Bureau of Fire Protection sa ilalim ng superbisyon ni Fire Chief Inspector Nonilon Macasadia II at naapula ang sunog matapos ang halos kalahating oras.
Ayon sa mga arson investigator ang bangkay ng bata na halos nagmistulang uling ay narekober sa ilalim ng kama ng silid nito sa ikalawang palapag ng kanilang bahay.
Lumilitaw sa pagsisiyasat na electrical short circuit ang pinagmulan ng sunog.
- Latest