Apo ng alkalde pinalaya ng Abu
MANILA, Philippines - Matapos ang halos isang taong pagkakabihag, pinalaya na ng mga teroristang Abu Sayyaf Group ang 3-anyos na apo ng alkalde ng Pitogo, Zamboanga del Sur sa isang lugar sa Sulu, ayon sa opisyal kahapon.
Base sa ulat ng Joint Task Group Sulu, kinilala ni Major Felimon Tan, Army’s regional spokesman ang pinakawalang bihag na si Ace Jay Garban, apo ni Pitogo Mayor Richard Garban na dinukot noong Marso 31, 2015 sa Brgy. Poblacion kasama ang kapatid nitong si Zynielle Jay at panadero na si Ledegie Tomarong.
Si Zynielle Jay ay pinatay ng mga kidnaper kung saan itinapon at narekober ang bangkay nito sa karagatan ng Zamboanga del Sur noong Abril 3, 2015 habang si Tomarong naman ay pinawalan sa Brgy. Kagay, bayan ng Indanan, Sulu.
Bandang alas-2:42 ng hapon ng pakawalan ang bata sa liblib na bahagi ng Brgy. Buanza sa bayan ng Indanan, Sulu.
Namataan naman ng mga residente na naglalakad na mag-isa ang bata ay agad nila itong ini-report sa tropa ng militar na nakabase sa lugar.
Dinala ang biktima sa Internal Defense Force sa pamumuno ni Col. Bernie Sun, deputy commander ng Army’s 501st Infantry Brigade.
Pinagamot din ang bata sa Trauma Hospital sa Camp Bautista sa Brgy. Busbus, Jolo, Sulu.
Nakipag ugnayan na ang mga opisyal ng militar sa pamilya ng bata upang masundo na ito pabalik sa kanilang bayan.
- Latest
