2 kawani ng medical lab todas sa kawatan
BATANGAS, Philippines – Dalawang kawani ng clinical laboratory ang napatay matapos barilin ng mga kawatan na nanloob sa kanilang opisina sa Batangas City noong Linggo ng hapon. Kinilala ang dalawa na sina Jeffrey Nilo Narvaza, 35, caretaker ng Ramos Building; at Leonora Falceso, 69, caretaker ng Batangas Clinical Laboratory na matatagpuan sa D. Silang Street sa Barangay 19 sa nasabing lungsod.
Base sa police report, ang dalawang suspek na nakilala sa CCTV footage ay sina Mark Anthony “Aso” Burog at Roderick “Ilik” Bonifacio ang pumasok sa compound na pag-aari ng isang Dr. Celso Ramos bandang alas 3:06 ng hapon.
Sa salaysay ng saksi, nang pumasok sa compound ang mga suspek ay bigla nitong binaril si Narvaza bago pinasok ang katabing Batangas Clinical Laboratory kung saan nilimas ang P.7 milyong cash.
Gayon pa man, nang papatakas na ang mga suspek ay nakita naman si Falceso na nakatayo sa pinto ng clinic saka kinaladkad at binaril din ni Burog sa mukha.
- Latest
