Pasahero tumalon mula sa barko

MANILA, Philippines - Pinaniniwalaang matin­ding depresyon ang nagtulak sa 20-anyos na pasahero na magpatiwakal matapos itong tumalon mula sa sinasakyang barko sa karagatan ng bayan ng Baleno, Masbate kamaka­lawa ng tanghali.

Sa police report na nakarating sa Camp Crame, kinilala ang namatay na si Aljun Padera ng Palanas, Masbate.

Bandang alas-11:41 ng umaga nang lumun­dag ang biktima  mula sa sinasakyang Elavil Bus Corp na nakalulan sa M/V King Frederick (roro vessel) sa karagatan ng Sitio Bagabawug sa Brgy. Magdalena.

Agad namang nagsagawa ng rescue operation ang mga tripulante kung saan may ilang oras din pinag­hahanap ay narekober din ang bangkay ng biktima.

Sa tala ng pulisya, ang biktima ay ika-13 sa mga pasaherong tumatalon sa barko bunga ng hindi makayanang problema.