Ina, sanggol kinatay

MANILA, Philippines - Malagim ang sinapit na kamatayan ng isang ina at sanggol nitong anak makaraang pagtatagain ng hindi pa nakilalang mga salarin na pumasok sa kanilang tahanan   sa bayan ng Paracale, Camarines Sur, kahapon.

Kinilala ang na­sawing mag-ina na sina Diane Mamaril, 20 at anak na si Altea Mamaril Saynes, mahigit isang taong gulang.  Ang mag-ina ay tadtad ng mga taga sa iba’t ibang bahagi ng katawan nang datnan ng Scene of the Crime Operatives (SOCO) team na nagresponde sa lugar.

Sa ulat ng Camarines Sur Police, bandang alas-12 ng madaling-araw nang marinig ng kanilang mga kapitbahay ang umano’y kalabugan mula sa tahanan ng mga biktima.

Gayunman sa pag-aakalang nag-aaway lamang ang mag-live-in partner ay hindi ito pinansin ng kanilang mga kapitbahay.

Kinaumagahan ay nadiskubre ang bangkay ng mag-ina na kapwa tadtad ng mga taga sa iba’t ibang bahagi ng katawan. Sinasabing wala umano ang live-in partner ng ginang ng mangyari ang pamamaslang sa kaniyang mag-ina.

Patuloy naman ang ma­susing imbestigasyon ng mga awtoridad upang matukoy at maaresto ang mga suspek na nasa likod ng krimen.