8-anyos kinidnap, pinatay
CAMARINES NORTE, Philippines – Pinaniniwalaang hindi kaagad nakapagbayad ng ransom money kaya pinatay sa sakal ang 8-anyos na anak ng trader matapos itong kidnapin ng mga armadong lalaki sa bayan ng Virac, Catanduanes kamakalawa.
Natagpuang patay malapit sa gusali ng BIR sa Barangay San Isidro Village ang biktimang si Sean Andrei Agripa, Grade 2 pupil sa Virac Pilot Elementary School at nakatira sa Barangay Gogon Siriangan sa nasabing bayan.
Isa sa mga suspek na si Cecillio Paredes ay nasakote sa isang lodging house sa isinagawang follow-up operation ng mga operatiba ng pulisya.
Nabatid na sinundo ni Paredes ang biktima sa eskuwelahan kung saan sumama naman ito dahil kakilala ng kanyang mga magulang kung saan hindi na nakauwi ang bata.
Samantala, ikinanta naman ni Paredes ang mga pangalan ng kanyang kasabwat sa kidnapping group matapos itong sumailalim sa tactical interrogation ng pulisya.
Pansamantalang hindi muna isiniwalat ng pulisya ang pagkakakilanlan ng iba pang kidnaper habang isinagawa ang operasyon laban sa mga suspek.
Sinasabing nabaon sa pagkakautang si Paredes kaya dinukot nito ang biktima para ipatubos sa mga magulang kung saan hindi agad nakapagbayad ng ransom money kaya pinatay ang bata upang hindi sila maituro.
- Latest