Preso nagbigti sa palikuran

NORTH COTABATO, Philippines  - Pinaniniwalaang desperado sa kabuhayan ang isa sa motibo kaya kusang nagpasalubong kay kamatayan ang 37-anyos na preso matapos itong magbigti sa palikuran ng kulungan sa Barangay Amas, Kidapawan City, North Cotabato noong Biyernes ng gabi. Kinilala ng pulisya ang biktima na si Crisanto Lupo ng Madrid Street, Kidapawan City at nahaharap sa kasong rape. Ayon sa ulat, nagpaalam ang biktima sa jail guard na si Leonard Villasor para maligo sa palikuran kaya sinamahan ito ng guwardiya.  Subalit bumuhos ang malakas na ulan kaya nagpasya si Vilalsor na bumalik sa kanyang puwesto. Nang humupa ang ulan ay hindi pa bumabalik sa selda ang biktima at nang inusisa ng guwardiya ay natagpuan ito na nakabitin.