AFP at PNP hirap sa clearing operations sa Marawi City

MANILA, Philippines — Kahit halos tatlong buwan nang tapos ang giyera sa Marawi City ay inamin ng militar at pulisya na sila ay nahihirapan sa isinasagawang clearing operations sa may 24 barangay sa lungsod.

Matapos ang pagkakatuklas ng Joint Task Force Ranao at Marawi City Police na maraming ibinaong bomba na binaon ng Maute ang hindi pa sumasabog.

Ayon kay Marawi City Police Office Director Supt. Ebra Moxsir, nasa 560 units na ng improvised explosive devices (IEDs) na hindi pa sumasabog ang kanilang narekober at nasa anim na sektor pa ang hindi nila nagagalaw.

Giit ni Moxsir na maingat na pumapasok ang mga tauhan ng Explosives Ordinance Division katuwang ang Army engineers, at K9 unit ng Armed Forces of the Philippines (AFP) sa ground zero dahil hindi pa nagalaw ang mga hindi pa sumasabog na bomba na nakalibing ng hanggang 10 metro ang lalim.

Nauna na ring inamin ni Joint Task Force Ranao deputy commander Col. Romeo Brawner Jr na mas nahirapan ang government forces na magsagawa ng clearing operations sa Sectors G, H at I dahil ito ang mga huling area na pinagtaguan ng mga terorista.