‘Di pa patay ang Cha-cha – Koko

MANILA, Philippines — Mariing kinontra kahapon ni Senate President Aquilino “Koko” Pimentel  ang pahayag ng ilang kasamahang senador na “Cha-cha is dead” o patay na ang panukalang Charter change.

Giit ni Pimentel, seryoso ang pagsusulong ng Cha-cha at hindi dapat balewalain o pagtawanan ng mga kontra na amyendahan ang Konstitusyon.

“Huwag naman ganoon. Dapat ang pag-amyenda sa Constitution ay in good faith. Huwag naman tatawa-tawa ‘yong mga against sa pag-amyenda,” ani Pimentel.

Una nang sinabi ng ilang senador na “Cha-cha is dead” matapos tumanggi ang Senado na sumali sa anumang joint session ng House of Representatives upang maging “constituent assembly” na mangunguna sa pag-amyenda ng Konstitusyon.

    Sinabi ni Pimentel na maaari namang magkahiwalay na ituloy ng Senado at Kamara ang ginagawa at pag-aaral tungkol sa panukalang pag-amyenda sa Konstitusyon.

Umaasa si Pimentel na sa susunod na dalawa hanggang tatlong buwan ay magkasundo na ang dalawang kapulungan pero hindi aniya dapat sabihin na patay na ang Cha-cha.

Balak ni Pimentel na kausapin si House Speaker ­Pa­n­taleon Alvarez sa hinaharap kapag maluwag na umano ang kanilang schedules.