Taas-presyo sa petrolyo at kuryente sisirit
Ayon sa datos ng Department of Energy (DOE), nasa P2.97 ang dadagdag na ‘excise tax’ sa petrolyo na mag-uumpisa na ngayong Enero 15 at dadagdag pa dito ang panibagong dagdag-presyo dahil sa pagtataas sa presyo ng petrolyo sa internasyunal na merkado. File
Arangkada ng TRAIN law...
CEBU, Philippines — Ngayong darating na linggo ay mararamdaman ang malaking pagtaas sa presyo ng petrolyo habang sa Pebrero ay sisirit ang presyo ng kuryente dahil sa ‘excise tax’ dulot ng TRAIN (Tax Reform for Accelaration and Inclusive) law.
Ayon sa datos ng Department of Energy (DOE), nasa P2.97 ang dadagdag na ‘excise tax’ sa petrolyo na mag-uumpisa na ngayong Enero 15 at dadagdag pa dito ang panibagong dagdag-presyo dahil sa pagtataas sa presyo ng petrolyo sa internasyunal na merkado.
Tinatayang nasa pagitan ng P.80-P.90 sentimos kada litro ang itataas sa presyo ng gasolina kaya maaaring umakyat ang presyo nito ng P3.77-P3.87 kada litro.
Nasa P.40-P.50 sentimos kada litro naman ang iaakyat ng Diesel at Kerosene na aabot sa P3.20-P.3.30 kada litro ang maaaring itaas.
Dahil sa ‘excise tax’ din sa coal at ‘value added tax’ sa ‘transmission charge’, inaasahan naman na aakyat din ng P16.6 ang tinatayang itataas ng bill ng kuryente ngayong Pebrero sa mga kliyente na kumokunsumo ng 200kwH kada buwan.
Paliwanag ng Manila Electric Company (Meralco), 30-33% ng suplay ng kuryente na kanilang ginagamit ay buhat sa mga ‘coal fire powered plants’ na nasapol ng bagong buwis.
Nakatakdang namang silipin ng DOE ang limang gasolinahan na na-monitor nila na agad nagtaas ng presyo kahit hindi pa epektibo ang bagong buwis.
Maaari lamang umanong magtaas agad ng presyo ng kanilang produkto ang mga gasolinahan kung naubusan na ng lumang stock ng petrolyo at bagong suplay na ang kanilang ibinibenta.
Maaaring masampahan ng kasong ‘profiteering’ ang may-ari ng naturang mga gasolinahan kung mapapatunayan na nagkaroon ng pag-abuso.
- Latest
