PNP inalerto sa anibersaryo ng CPP
MANILA, Philippines — Nasa “high state vigilance” ang buong puwersa ng Philippine National Police (PNP) laban sa nakaambang mas matitindi pang pag-atake ng Communist Party of the Philippines (CPP) kaugnay ng pagdaraos ng ika-49 taong anibersaryo sa darating na Disyembre 26.
Ayon kay PNP Spokesman Chief Supt. Dionardo Carlos na hindi hihintayin pa ng PNP na umatake ang NPA at pangungunahan na ang opensiba laban sa teroristang grupo katuwang ang AFP.
Anya, minobilisa na ng liderato ng PNP ang lahat ng kanilang tactical and maneuver units para sabayan ang pagtugis ng militar sa mga terorista.
Nagpalabas na rin ng alerto ang PNP National Headquarters sa lahat ng PNP units na paghandaan ang inaasahang paghahasik ng kaguluhan ng mga teroristang New People’s Army (NPA) ang armed wing ng CPP.
Sinabi ng opisyal, base sa data ng PNP, ang CPP/NPA ay regular na naglulunsad ng mga pag-atake sa panahon ng kanilang anibersaryo.
Partikular namang binabantayan ay ang mga himpilan ng pulisya sa mga kanayunan at gayundin ang mga instalasyon ng gobyerno sa mga probinsya.
- Latest
- Trending