Manila fire: 200 pamilya nawalan ng tirahan
MANILA, Philippines — Malungkot na Pasko at Bagong Taon para sa 200 pamilya matapos silang masunugan ng bahay sa magkahiwalay na insidente sa Sampaloc at Sta. Ana, Maynila kamakalawa ng gabi at kahapon.
Sa ulat ni Sr. Insp. Reden Alumno ng Manila Fire Department, kahapon ng alas 11:22 ng umaga nang sumilklab ang sunog sa Pasig Line, Paco, Maynila kung saan naapektuhan ang nasa 10 kabahayan na tinutuluyan ng 20 pamilya. Umakyat lamang sa ikalawang alarma ang sunog na naideklarang fire-out alas-12:23 ng hapon. Pinaghihinalaang dahilan ang kumislap na kawad ng kuryente na nakita ng ilang residenete bago maganap ang sunog.
Una rito, alas-7:00 kamakalawa ng gabi nang masunog naman ang nasa 12 hanay ng paupahang mga apartment na pawang may kalumaan sa Alfonzo Mendoza st, panulukan ng Ma. Clara st., sa Sampaloc. Nakatira naman sa mga nasunog na kabahayan ang nasa 180 pamilya.
Ayon sa ulat ni Chief Insp. Crossib Cante ng Manila Fire Dept., umakyat sa ikalimang alarma ang sunog na naideklarang fire-out alas 10:26 ng gabi.
Pawang dominant umano ang kahoy o light materials sa yari ng mga apartment kaya mabilis na kinain ng sunog isa-isa ang magkakatabing apartment na nagsimula sa pinakadulo. Naging mabilis naman sa pagresponde ng nasa 5 fire trucks ng Manila Fire Dept. at 5 truck din mula sa Fire Volunteers.
- Latest