2 bagong nurse utas sa bangga
MANILA, Philippines — Hindi napakinabangan ng dalawang bagong nurse ang kanilang propesyon matapos na sila ay masawi nang sumalpok sa barandilya ng isang tulay ang kanilang sinasakyan sa highway ng Brgy. Barrio Luz, Cebu City.
Ang mga nasawi ay kinilalang sina Louis Mitchell Nayre Ferolin at Alexa Eddy Carvajal; pawang nursing graduate ng Batch 2017 Cebu Doctors University (CDU) na kapapasa pa lamang sa Nurse Licensure Examination noong Nobyembre at ang resulta ay ipinalabas ng Professional Regulation Commission (PRC) nitong Disyembre 12.
Sa naantalang ulat ng Cebu City Police, naaksidente ang sinasakyang Isuzu MU-X (ABN-5206) ng dalawang biktima noong Martes ng madaling araw at namatay ito kinabukasan habang isinasalba ang buhay sa pagamutan.
Sa ulat, minamaneho ni Ferolin ang nasabing sasakyan nang mawalan ito ng kontrol sa manibela habang paakyat sa flyover dahilan upang ito ay sumalpok sa bakal na barandilya ng flyover at sa lakas ng pagkakabangga ay nagtamo ng matitinding sugat ang mga biktima na kanilang ikinamatay.
- Latest
