Mag-ama inutas ng npa

MANILA, Philippines — Niratrat ng mga teroristang New People’s Army (NPA) ang mag-ama sa loob ng kanilang bahay sa Sitio Hacienda, Brgy. Inabuan, San Francisco, Quezon, kamakalawa ng gabi.

Ang mag-amang nasawi noon din ay kinilalang sina Manolito Alcantara, 48, CAFGU at Randy Alcantara, 29 na STL collector.

Batay sa ulat, bago nangyari ang pamamaril dakong alas-7:30 ng gabi sa Sitio Hacienda, Brgy. Inabuan, San Francisco ay kasalukuyang naghahapunan ang mag-ama nang biglang pasukin ng mga teroristang NPA ang bahay at walang kaabug-abog na pinagbabaril sila.

Natukoy naman na ang grupo ng NPA terrorists na si Joseph delos Santos alyas Ka Bingot/Ka Ken at ilan pa nitong kasamahan ang nasa likod ng pamamaslang sa mga biktima.

Narekober  sa pinangyarihan ng insidente ang 12 piraso ng bala ng cal 5.56 , apat na bala ng cal 9 MM, isang piraso ng cal 5.56.